Počeo protest “Novinari ne kleče”

Skup pod nazivom “Novinari ne kleče/PredsJedniče Vlade održite obećanje” počeo je u 19 časova u Beogradu ispred Vlade Srbije, a održava se i u drugim gradovima Srbije.

Protesti se održavaju i u Novom Sadu, Nišu, Kragujevcu i Vranju.

Ispred Vlade Srbije u Beogradu okupilo se oko 150 ljudi koji protestuju zbog toga što ministar odbrane Bratislav Gašić još nije smijenjen.

http://twitter.com/ITkutak/status/679004033672216577/photo/1

Odlaganje ispunjenja obećanja koje je predsjednik Vlade Srbije Aleksandar Vučić javno dao u nekoliko navrata da će smijeniti Bratislava Gašića sa mjesta ministra odbrane Srbije je, prema mišljenju Asocijacija onlajn medija, nedopustivo.

Podsjetimo, 7. decembra je ispred zgrade Vlade u Beogradu održan protest novinara povodom izjave ministra odbrane Bratislava Gašića da “voli novinarke koje lako kleknu”.

http://twitter.com/ekatarinamalaa/status/679004224475238400/photo/1

Gašić je primitivnu izjavu dao nakon posjete “Prvoj petoletki namjenskoj” u Trsteniku, kada je vidio kako dopisnica B92 čuči da ne bi bila snimljena u kadru dok ministar govori.

Nakon što je u medijima objavljena njegova izjava, ministar je uputio pisanu izjavu, u kojoj naveo da nema opravdanja za svoju izjavu i “sramno i skandalozno ponašanje”.

Ubrzo je reagovao i premijer Aleksandar Vučić, koji je naveo da je u pitanju sramno ponašanje bez opravdanja.

Novinarska udruženja su zatražila njegovu smjenu i podržala najavljeni protest ispred zgrade Vlade Srbije.

B92 je osudio Gašićevu izjavu i naveo da će konsekvence koje ministar bude pretrpio zbog svog političkog stava dati odgovor na pitanje o prirodi vlasti ove Vlade i dati odgovor na pitanje da li je stav ministra Gašića politička pozicija Vlade čiji je član.

Gašićevu izjavu su kritikovali i predstavnici opozicije, civilnog društva, povjerenik Rodoljub Šabić i povjerenica Brankica Janković, ali i njegova koleginica iz Vlade Zorana Mihajlović.

Ministar rada Aleksandar Vulin je rekao da je Gašićev komentar neprimjeren, ali da je Gašić “dobar čovjek i da je njemu sada najteže”.

Premijer Vučić je tada istakao da Bratislav Gašić ne može da ostane na funkciji zbog izjave da “voli novinarke koje lako kleknu”.

(B92)