Talasi odvlače ljude, leti kamenje, stvorila se pijavica VIDEO
Foto: Screenshot
Nedjeljno popodne na obali Španije obilježio je iznenadni i teško predvidiv meteorološki fenomen.
Jaki udari vrelog vjetra, koji su dostizali skoro 90 km/h i nagli skok temperature i do 40 stepeni Celzijusa prevrtali su ležaljke i suncobrane i otežavali kretanje, a mnogi kupači bili su ugroženi zbog nagle promjene vremena.
Španska meteorološka služba Aemet saopštava da je se uobičajen dan na plaži blizu Granade za samo nekoliko minuta pretvorio u rizičnu situaciju, nakon što su iznenadni talasi odvukli na otvoreno more ljude koji su se izležavali u plićaku na dušecima drugim rekvizitima, piše Juronjuz.
Civilna garda uspjela je da spase troje ljudi ispred plaže La Joja, dok su još dvoje mladih pomogli putnici sa privatnog čamca i prevezli ih u luku Motril.
Primijećena i morska pijavica
Oko osam sati uveče svjedoci su primijetili morsku pijavicu kod mjesta Torenueva. U isto vrijeme, snažan vjetar u Salobrejni i Kalahondi primorao je kupače da naglo napuste plaže.
Neki su se povukli odmah, dok su druge zatekli udari vjetra koji su podizali čak i veće kamenje i dijelove krovova.
Na auto-putu ka Granadi stvorila se gužva zbog masovnog napuštanja plaže.
Čak 20 poziva hitnim službama
Hitna služba Andaluzije primila je oko 20 poziva – od prijava oborenih grana do odvaljenih tendi i krovnih vijenaca u Motrilu i Granadi. Bilo je i kratkotrajnih prekida u snabdijevanju strujom.
Iako je nastao haos, povrijeđenih nije bilo.
Ovakvi udari vrelih vjetrova nastaju kada masa vazduha naglo krene ka površini i prolaskom kroz suve i vrele slojeve dodatno ubrza i ugrije se. Rezultat su snažni udari vjetra i nagli porast temperature.
